Misioni i të dërguarit të OSBE-së dështon në Tiranë. Konsensusi është ende larg. Berisha i vë kushte Vranickit
“Vizitoni Jugun e binduni vetë a bëhen dot zgjedhje”
Fino: Komitetet nuk janë të rrezikshme. Ushtarët e misionit ruajnë kutitë tona të votimit
Vranicki: Do t’ju ndihmojmë ekonomikisht, por qëllimi i misionit tim është së pari, të bëhen zgjedhjet.
Berisha: Dërgoni njerëzit tuaj të verifikojnë Jugun, pastaj vendosim datën e zgjedhjeve.
Tiranë – Ende larg kompromisit për zgjedhjet në Shqipëri, ndonëse vazhdojnë përpjekjet e misionerit europian për të bindur të gjitha palët në konflikt. Eshtë dita e dytë e Vranickit në Tiranë ndërkohë që asnjë rezultat konkret nuk është arritur për këtë qëllim. Berisha insiston sërish në një pengesë kryesore për zhvillimin e zgjedhjeve, pengesë ai quan komitetet e rebelëve.
Fino i thotë Vranickit se këto komitete nuk përbëjnë rrezik për fushatat elektorale dhe votimet e ardhshme në vend, ndërsa Nano e Shehu janë ende shumë larg një marrëveshjeje politike për natyrën e ligjit që do të çojë Shqipërinë në këto zgjedhje. Vranicki ndodhet tashmë i rrethuar nga palët që duken ende kokëforta për të gjetur një gjuhë të përbashkët, edhe pse nuk është hera e parë që ai vjen në Tiranë.